CAGAYAN DE ORO CITY- Gitutukan karon sa Cagayan de Oro City Police Office o COCPO ang dagko nga organized robbery syndicate groups nga hayan mosulod aron mohimo’g pagpanulis sa dagkong mga balay-patigayon sa syudad.
Kini aron gamiton isip tinubdan sa ‘dirty money’ sa pipila ka mga kandidato nga ipangpalit sa boto sa mga botante sa 2019 midterm elections sa rehiyon.
Gihimo ni COCPO spokesperson Police Supt Mardi Hortillosa ang komento human subli matulis ang branch sa LBC diin 35-mil pesos nga kinitaan ang nadala sa duha ka tulisan ning syudad sa miaging semana.
Namahayag si Hortillosa nga dili imposible nga sudlan sa dagkong grupo sa mga tulisan ang rehiyon ilabina nga nahimutang ang dagko nga mga establisimiento sa syudad bisan sa kusog nga pagpatuman sa martial law sa Mindanao.
