CAGAYAN DE ORO CITY – Wala atakeha sa armadong grupo ang estasyonan sa mga pulis sa lungsod sa Saguiaran,Lanao del Sur.
Kini ang katin-awan ni Police Maj. Alinmajid Moner,tigpamaba sa Lanao del Sur Provincial Police Office kabahin sa mikatag nga impormasyon sa maong lugar.
Miingon si Moner nga simple nga bangi sa trapiko ang natigayon apan nag-resulta sa pagpamusil.
Siya miingon nga usa ka motorista nga sakay sa motorsiklo ang nasuko sa pikas drayber nga nagmaneho sa revo vehicle nga nag-resulta sa pagginamitay na sa puwersa.
Samaron sa pagpamusil sa grupo sa mga suspek ang mga biktima nga sila Samuranao Mangundas;Salipuddin Tinaraan;Pandao Bashir ug Alrahe Sayid nga mga negosyante ug nagpuyo sa maong lugar.
Narekober sa kapolisan ug militar ang mga kapsula sa 45 nga armas ug ang Toyota Hi-Lux nga gisakyan sa mga misibat nga mga suspek.
