CAGAYAN DE ORO CITY – Hawid na sa kapolisan ang usa sa lima ka persons of interest o POIs nga responsable sa pagpabuto’g armas nga miigo-patay sa 12 anyos nga batang babaye sa Purok 10, Sitio Mirasol,Sapad, Lanao del Norte sa miaging pagsugat sa bag-ong tuig.
Miingon si Police Regional Office 10 Director Brig Gen Rolando Anduyan nga gipaubos na sa ballistic test ug paraffin test ang wala una hingangli nga POI aron sutaon ang iyang kalambigitan sa kamatayon ni Suzette Manamparan.
Gibutyag sa heneral nga dili palabyon apan hataga’g hustisya ang nahitabo sa bata nga igo lamang nakigduyog sa kasaulugan sa bag-ong tuig apan disgrasyang naigo sa bala sa 45 nga armas ang ulo.
Hisayrang natawag ang atensyon sa PNP-Camp Crame sa hitabo tungod kay bugtong kini lamang ang natala nga dunay namatay nga indiscriminate firing sa pagsugat sa bag-ong tuig sa nasud.
