CAGAYAN DE ORO CITY – Na-otopsiya na ang patay’ng lawas sa police asset nga unang gipusil-patay sa aktibong pulis tungod sa giingong personal nga dumot sa Tangkungan,Sitio Pinikitan,Brgy Camaman-an ning syudad.
Kini subay sa sulti sa mga personahe sa Bollozos Funeral Homes nga maoy nag-kustodiya sa patay’ng lawas sa biktima nga si Henry Pimentel nga taga-Brgy Macasandig ning syudad.
Si Pimentel ang nakaangkon sa daghang samad pinusilan gikan sa armas nga gigamit sa pulis nga gikalalis niini sa wala pa ang hitabo sa miaging Lunes sa kadlawon.
Una nang gikompirmar ni Cogon Police Station commander Major Sabino Labitad nga nakasuhan na murder ang suspek gihukasan una sa tsapa samtang ipaubos sa pagtaral ang kaso.
Dumduman usab nga mihimo usab sa kaugalingong imbestigasyon si City Internal Affairs Service head Lt Col Henry Cay-as batok sa suspek nga nag-atubang sa grave misconduct tungod sa panghitabo.
Hisayrang sulti ni Divisoria Police Station commander Major Peter Tajor nga kanhi asset sa maong pulis ang namatay’ng biktima.
