CAGAYAN DE ORO CITY – Dead on the spot ang police official nga nagsilbing hepe sa traffic enforcement unit sa Iligan City sa nalambigitan niini nga dugu-ong aksidente sa highway sa Brgy Mauswagon,Laguindingan,Misamis Oriental.
Giila ni Laguindingan Mayor Diosdado ‘Dadoy’ Obsioma ang biktima nga si Police Maj Abogado Mautin,38 anyos,minyo ug taga-Kolambogan,Lanao del Norte.
Namahayag si Obsioma nga padulong sa Cagayan de Oro City si Mautin aron mag-follow up sa iyang rank promotion dihang gikabangga niini ang trak de karga nga gimaneho ni Cocoy Agravante.
Gidali pa sa pagdala sa ospital ang biktima apan wala na kini kinabuhi nga nahiling sa mga doktor kagahapong adlawa.
Samtang gikasubo sa mga kaubang pulis ang kalit nga kamatayon ni Mautin.
Namahayag si Iligan City PNP Station 4 commander Maj Rory Tabuclin nga wala nila damha nga dangatan kini ni Mautin kinsa naila sa iyang katarong sa serbisyo sa ilang hanay.
Gilayong gidala sa iyang pamilya ang patay’ng lawas ni Mautin sa Lanao del Norte ug ilubong haom sa kustombre sa pagtoong Islam.
