CAGAYAN DE ORO CITY – Nanganti ang liderato sa Misamis Oriental Police Provincial Office nga dili na masubli nga dunay ilang pipila ka pulis nga mohatag mantsa sa organisasyon sama sa nahitabo sa lungsod sa Tagoloan ning lalawigan.
Maoy gitumbok ni Misamis Oriental PNP Director Col.Chonli Jun Caduyac ang nahatag nga kauawon sa gipakitang taras ni kanhi Tagoloan Police Station commander Capt Enrique Dungog nga konohay mi-responde sila sa gihimong kasaba sa pipila ka motorista apan nakainom ug wala naka-uniporme.
Giangkon ni Caduyac nga dismayado sila sa command group nga wala sunda sa maong mga pulis ang enskato nga gabayan sa pagpatuman sa balaod.
Kini ang rason nga manubag sila sa kasong administratibo samtang gipang-floating sa provincial holding and accounting unit sa headquaters sa lalawigan.
Samtang gihulatan na ni Police Regional Office 10 Director Police Brig Gen Ricardo Layug Jr ang official findings sa gihimong imbesitgasyon batok kang kanhi Tagoloan Police Station commander Capt Enrique Dungog ug laing duha ka kauban.
Kini human sila akusahi nga nag-abusar sa giingong pagbadlong sa mga batan-on nga naghinobra ang kasaba gamit ang ilang armas ug wala pagsul-ob sa uniporme samtang nag-responde.
Miingon si PRO spokesperon Maj. Joann Navarro nga subay sa ilang nakit-an sa nag-viral nga footage,dayag nga dunay pipila ka kasupakan nga nahimo ang grupo ni Dungog rason nga gipaniguro ni Layug nga mahatagan sa leksyon aron dili sundugon sa ubang mga pulis dinhi sa rehiyon.
Sa pagkutlo ning balita,mas gipili ni Dungog nga pabiling magpakahilom samtang atubangon ang imbestigasyon batok kaniya.
Dugtong niini,maoy gipuli sa gibakante nga puwesto ni Dungog si Police Capt. Rodel Labadan nga kanhi hepe sa Opol Police Station.
