CAGAYAN DE ORO CITY, Philippines – Gipasidunggan sa Cagayan de Oro City Police Office (COCPO) ang Police Station 4 Carmen, sa ilang malampusong pagluwas sa 50 anyos nga babayeng gihostage sa Brgy. Carmen ning syudad.
Gidawat ni Police Major Mario Mantala ang pasidungog, kagahapon.
Miingon si (COCPO) Spokesperson, Lt. Col. Evan Viñas, nga angayan pasidunggan ang nagresponde nga kapulisan sa nasampit nga hitabo.
Mahinumduman nga naila lamang ang suspek sa alyas “John”, hingkod ang edad ug molopyo sa Baroy, Lanao del Norte.
Base sa imbestigasyon, kalit nga misulod ang suspek sa balay sa biktima kay abri ang gate sa ilang balay.
Migamit sa gunting ang suspek dihang iyang nahuptan ang biktima ug nagdemand nga padad-an siya’g sakyanan pabalik sa Lanao.
Naabtan pa sa pipila ka minutos ang negosasyon ayha nadakpan sa mga elemento sa PS-4 ug SWAT ang suspek.
Nagtoo ang kapulisan nga nagutman ug nalisuan sa pangutok ang suspek, dihang mikompisal kini nga naka-abot siya sa Cagayan de Oro nga nagtiniil pagbaktas sa dalan ug wala pay kaon.
Usa ka pulis ug ang mismong biktimang babaye ang samaran sa insidente.
Detinado na ang suspek sa minicell sa PS-4.
Gitin-aw sa COCPO nga isolated case ang hitabo ug kini pa ang unang kaso sa hostage-taking sa syudad, ning tuiga.
Kagahapon, gihikay sa piskalya ang kasong frustrated murder batok sa suspek.
