CAGAYAN DE ORO CITY – Nakit-an nga dunay probable cause o gimbug-aton sa piskalya hinungdan gisaka sa korte ang robbery extortion batok police officer nga unang nasikop sa kapolisan ning syudad sa miaging semana.
Miingon si Police Captain Rogie Ortencio,hepe sa Divisoria Police Station nga kon dili makapiyansa si Patrolwoman Sheryl Lou Licayan sa Carmen Police Station,hayan masaka kini sa city jail ning semanaha.
Una niini,kasong direct bribery, estafa ug graft charges ang ilang gipasaka batok Licayan apan ang robbery extortion lamang ang nakit-an nga dunay igong basehan sa piskalya.
Una usab niini,gihimakak ni Licayan nga nadawat niya ang 3-mil pesos nga salapi nga gigamit sa entrapment operation batok kaniya sa miaging semana.
Samtang gikompirmar ni Cagayan de Oro City Police Office spokesperson Police Lt Col Mardi Hortillosa nga mag-pyansa karong adlawa ang babayeng pulis nga nadakpan sa entrapment operation tungod sa pagpangilkil.
Si Hortillosa miingon nga anaa sa P100,000 ang gidemanda nga pyansa sa City Prosecutors Office batok kang Licayan human makita-an sa probable cause ang kasong robbery extortion nga gipasaka ngadto kaniya.
Dugang ni Hortillosa nga ila usab iduso ang administrative case batok sa suspek.
