CAGAYAN DE ORO CITY-Nagka-political crisis ang liderato ni Mayor Celso Regencia sa Iligan City.
Kini human pakyas makakuha’g temporary restraining order ang mga alyado niini sa city council sa Court of Appeals batok sa suspension order gikan s Ombudsman.
Gikompirmar ni City Vice Mayor Jemar Veracruz nga kuyog ang 12 ka konsehal,gisilotan sila sa Ombudsman sa kapi’g usa ka bulan nga suspension tungod sa kasong simple misconduct nga unang giduso ni kanhi Iligan City Rep Vicente Belmonte.
Miingon si Veracruz nga maglisod si Regencia sa pag-serbisyo sa katawhan kon mawala ang ilang tahas isip kaabag sa konseho.
Si Regencia ug Belmonte ang dunay lawom nga bikil-politika diin may nahitabo pa nga pagpang-ambush nga gikamatay sa pipila ka tawo sa bisinidad sa airport sa Laguindingan,Misamis Oriental niadtong Disyembre 2014.
Nagsumikad ang suspension ni Veracruz ug laing dose ka konsehal samtang duha lamang ang nabilin sa konseho dihang giila nila isip mayor si Regencia bisan nabilanggo tungod sa kasong murder.
