Gisaway ni Association for the Philippines-China Understanding Secretary General Prof. Anna Malindog-Uy ang mga pro-American sa Pilipinas ug pipila ka Amerikano nga, matod pa niya, ginatuklod ang nasud nga mosulod sa tensiyon tali sa Pilipinas ug China.
Namahayag si Uy niini sa iyang interbyu sa Bombo Radyo, diin iyang giingon nga dili kinahanglan magbangga o mogamit og pwersa ang Pilipinas kay ginabutang lamang niini sa peligro ang nasud.
Sumala kaniya, ang paggamit sa pwersa dili solusyon ug makapalala pa sa sitwasyon sa rehiyon.
Nagatoo si Uy nga ang pinakamaayong buhaton sa gobyerno sa Pilipinas mao ang pagpaagi sa malinawon nga negosasyon ug diplomasiya aron makab-ot ang hustong settlement.
Gipasabot usab niya nga ang pagdumili sa paggamit sa pwersa dili usa ka porma sa pagtraydor sa nasud.
Giingon ni Uy nga sayop ang pagtan-aw sa pipila ka kritiko nga ang usa ka Pilipino nga mopadayag og malinawong baruganan sa maong isyu matawag dayon og traydor. (James Oliver)
