CAGAYAN DE ORO CITY-Mibaha ang pagpaabot sa pasubo gikan sa nagkadaiyang sektor partikular sa mga empleyado sa gobierno diin nangahalagad isip elected government official si Padayon Pilipino Party founder Vicente ‘Dongkoy’ Yap-Emano nga lumad sa lungsod sa Tagoloan,Misamis Oriental.
Kini human kompirmaha sa iyang anak nga si Misamis Oriental Gov Bambi Emano ang kamatayon sa amahan niini tungod sa sakit nga pnuemonia sa edad nga 76.
Si Emano ang nadala pa sa ospital dihang misuol ang iyang sakit diin nakig-pamauli pa kini sa pinuy-anan ayha hingpit nabugtuan sa kinabuhi pasado alas dose sa kagahapon sa kadlawon.
Gawas sa pamilyang Emano,Yap ug Beja,nagpaabot usab sa pasabo ang mga alyado sa politika sa kanhi mayor sa Cagayan de Oro sa ilang kagul-anan tungod sa gidangatan niini.
Bisan ang mga ribal sa politika ni Emano nga naglakip kang incumbent City Mayor Oscar Moreno ang wala pagpanuko pagpaabot sa pakigduyog sa kasub-anan nga gibati sa pamilya ug kabanay niini.
Gani,gibutyag ni Moreno nga bisan sa grabe nila nga lantugi ug bangi sa politika ni Emano apan sa tinood nga kinabuhi,nagpabilin ang ilang panaghigala.
Naghatag pagyukbo usab ang uban pang mga politiko sa Misamis Oriental ug Cagayan de Oro diin si Emano ang naggiya kanila sa political government service.
Si Emano ang ilado usab sa ubang elected government officials sa dakong bahin sa Mindanao tungod sa pagsilbing peace maker niini pag-abot sa hisgutanan sa insurhensiya ug ubang nahitabong kreminalidad.
Si Emano ang kasamtangang midagan pagka-bise alkalde diin kontra niini ang runningmate ni Moreno nga si City Vice Mayor Rainer Joaquin ‘Kikang’ Uy.
Gihaya ang abo sa gi-cremate nga lawas sa kanhi gobernador sa Misamis Oriental sa ilang pinuy-anan sa Sta.Cecilia,Barangay Gusa sa syudad sulod sa tulo ka adlaw ayha kini dad-on sa katapusang pahulayan sa Tagoloan sa adlaw’ng Sabado.
Nagsugod ang political career ni Emano isip mayor sa lungsod sa Tagoloan sa 1980 hangtod 1983 ug nagsilbing gobernador sa Misamis Oriental sa 1988-1998.
Milampos usab si Emano pagsulod sa Cagayan de Oro aron mahimong mayor sugod tuig 1998 hangtod 2007.
Nangalagad gihapon si Emano isip bise-alkalde sa tuig 2007 hangtod 2010 sa syudad.
Ulahi nga nahuptan ni Emano nga posisyon ang pagka-mayor dihang nasublihan sa miaging 2010 hangtod 2013 sa dakbayan.
