CAGAYAN DE ORO CITY – Trabaho una sa local government units kon duna sila’y aktibong ordinansa nga magbaklas sa political materials nga mokatag sa pipila ka bahin sa usa ka lugar.
Kini ang gihimong pagtin-aw ni Commission on Elections 10 regional director Atty. Renato Magbutay nunot sa isyu nga pagkatap sa election materials nga napatiko ang hitsura ug pangalan ni Misamis Oriental 2nd District Sangguniang Panlalawigan Board Member Gerardo Sabal III sa syudad sa miaging semana.
Miingon si Magbutay nga wala pa sa gahom sa ahensiya nga mohimo’g pagbadlong o mokaso sa bisan kinsa tungod kay wala pa magsugod ang election period alang sa sunod tuig nga piliay.
Siya miingon nga bugtong makabadlong sa maong mga kalihukan sa pipila ka political supporters ang local government subay sa ordinansa sa syudad o lungsod.
”Dili pa mana sila mga kandidato.We have no jurisdiction over them.Di pa na nato sila masita nga ipatangtang kay dili pa man sila mga kandidato’
Una nang miani sa pagsaway ang pagkatag sa materyales nga dunay dagway ug pangalan ni Sabal kay nagtoo ang uban nga misakay kini sa panahon.
Apan gilayong nangayo usab sa pasaylo si Sabal nga namutang ang iyang mga suporters kay unang-una wala daw kini masayod nga dunay lakang nga susama niini.
