CAGAYAN DE ORO CITY – Gipasalamatan gikan sa kinauyukang bahin sa iyang kasingkasing ni kanhi mayoralty candidate Jose Gabriel ‘Pompee’ La Viña ang 81-mil 726 nga mibotar kaniya sa 2025 midterm elections sa syudad.
Kini agi’g paghatag na’g dalan ug pag-ila nga anaa kang City Mayor Rolando ‘Klarex’ Uy ang dakong pabor gikan sa katawhan sa subli nila panagtigi sa pagka-alkalde sa May 12 elections.
Apan miingon si Pompee nga unta mapun-an pa ang ihap sa mga tawo nga mipabor kaniya nga misalikway sa mga binuhatan nga pagpamalit sa mga boto aron lang makasap-ang sa katungdanan.
Siya miingon nga unta dili mabugnaw apan padayong mainiton ang katawhan nga dakong alkontra sa ‘vote buying’ nga wala kawad-i sa paglaum alang sa singgit nga ‘Bag-ong Cagayan.’
Mihatag kini’g senyales nga tungod sa iyang dakong pagpangga sa dakbayan,dili niya ihunong ang iyang mga sakripisyo ug mga pakigbisog nga mohatag sa ikaarang sa kadaghanan.
