Nabalaka ang daghang residente sa Barangay Canitoan tungod sa gi-anunsyo sa PN Roa Canitoan Transport Cooperative (Pontransco) nga temporaryo nilang i-undang ang ilang rota sugod Biyernes Santo, Abril 3, tungod sa grabeng pagsaka sa presyo sa lana ug sa walay pagsaka sa pletehan.
Sa pakighinabi sa BOMBO RADYO, gikompirmar ni Barangay Chairman Lance Padla ang pahibalo gikan sa grupo nga gipangulohan ni Luzminda Escobidal. Gibutyag ni Padla nga wala naghatag sa klarong petsa ang transport group kung kanus-a sila mobalik sa operasyon. Nabalaka kini sa posibleng senaryo sa Lunes, Abril 6, diin mamalik na sa trabaho ang mga trabahante ug ang uban mahimong magkalisud sa pagbiyahe padulong sa sentrong bahin sa syudad tungod sa kakulang sa masakyan.
Tungod niini, ang kapitan sa barangay mi-inisyar sa pagpatawag sa meeting kauban ang City Administrator’s Office, Roads and Traffic Administration (RTA), ug ang walo ka transport association nga nag-operar sa ilang dapit aron masulbad ang kakulang sa public transport.
Hinoon, nakadawat sa pagsaad ang konseho ni Padla gikan sa opisina ni Mayor Klarex Uy nga magpadala sila sa mga sakyanan ug ipadayon ang paghangyo sa apektadong transport group nga mobalik sa operasyon.
Hisayran nga sukad misaka ang presyo sa krudo gikan ₱79 hangtod ₱130, daghang transport group ang nakahuna-huna nga muhunong sa pamasada tungod kay kulang ra ang fuel subsidy nga ilang nadawat ug ang cash assistance nga ₱5,000.
