Nagpabiling maalaumon gihapon ang PN Roa Canitoan Transport Cooperative o PONTRANSCO taliwala sa mga nasinating atras-abante nga lakang sa lokal nga kagamhanan sa pagpatuman sa Local Public Transport Route Plan o LPTRP, nga sinugdanan pa niadtong tuig 2023 pinaagi sa Memorandum Circular 2023-003.
Gani, matod pa ni Luzminda R. Escobidal, presidente sa maong kooperatiba, nga bisan pa man sa ilang sunod-sunod nga mga tigom kauban ang mga hingtungdan nga ahensya sama sa Land Transportation Franchising and Regulatory Board o LTFRB ug sa lokal nga kagamhanan sa syudad, padayon pa gihapon nga nagbitay ang tibuok implementasyon niini tungod sa mga giingong suspensyon ug kakulang sa pinal nga desisyon.
Dugang pa ni Escobidal, subay sa ilang nahimong kasinatian sa pag-agi sa nagkalain-laing “dry run” ug mga tanyag nga “partial implementation” pinaagi sa “common corridor”, gipadayag niya nga dako kaayo ang ilang tinguha nga matapos ang maong problema aron madali na pagkahikay ang tinuod nga hulagway sa transportasyon sa tibuok dakbayan.
