Gipamugos sa PN Roa Canitoan Transport Cooperative o PONTRANSCO nga mabalik na ang karaang ruta sa ilang mga sakyanan aron malikayan ang pagdouble-ride sa mga pasahero ug paggasto og dako tungod sa mahal nga krudo.
Samtang gipasabot ni Luzminda R. Escobidal Presidente sa PONTRANSCO, ang kasamtangang pagkabahin sa mga bag-ong ruta tali sa Distrito 1 ug Distrito 2 sa dakbayan naghatag lamang og kabug-at sa bulsa sa mga sumasakay tungod kay nagkinahanglan pa sila og dugang plete.
Gawas pa niana, giingon usab niya nga pinaagi sa single fleet management ug sa husto nga pag-implementar sa Local Public Transport Route Plan o LPTRP, masiguro ang walo ka oras nga pagbiyahe sa mga drayber nga sweldado ubos sa modernisasyon.
Busa, gilauman nga madiskusyon pa kini pag-ayo sa sunod nila nga tigom aron malantaw ang kinatibuk-ang hulagway sa maong programa ug masuta ang mga kolorum nga sakyanan sa syudad.
