CAGAYAN DE ORO CITY, Philippines – Gikompirmar sa Catholic Bishops’ Conference of the Philippines (CBCP) ang katudluan ni Msgr. Erwin Jose Balagapo isip undersecretary sa Dicastery for Evangelization sa Vatican.
Ang 53 anyos nga pari dugay nang nagsilbi isip hepe sa ‘first evangelization and new particular churches”, sukad Hulyo 2023, ug nagsilbing promosyon ang iyang bag-ong appointment.
Hisayran nga ang Santo Papa maoy nangulo sa Vatican Dicastery nga unang natukod sa tuig 2022 pinaagi sa apostolic constitution Praedicate Evangelium, nga maoy mihulip sa kanhi Congregation for the Evangelization of Peoples, o mas naila isop “Propaganda Fide.”
Si Balagapo lumad nga taga Sulat, Eastern Samar ug na-ordinahan sa arkidiyosis sa Palo sa tuig 1996.
Sa iyang pagkapari, misilbi usab kini sa daghang tahas sama sa pagka-propeso sa canon law, pagsilbing hepe sa nagpadayong formation sa mga kaparian, judicial vicar, ug chancellor sa arkidiyosis.
Iyang nahuptan ang iyang Doctorate in Canon Law sa Roma, sa Pontifical University of the Holy Cross, lakip na ang iyang lisenya sa Moral Theology gikan sa kanhi Pontifical Institute “John Paul II.”Isip usa ka canon Lawyer, miserbisyo kini sa Vatican dicastery sukad 2015.
