Gihangyo ni Pope Leo XIV ang mga obispo sa Pilipinas nga palig-onon ang pagkahiusa sa Simbahan ug hatagan sa pagtagad ang kapakanan sa overseas Filipino workers (OFWs) human sa 131st Plenary Assembly sa Catholic Bishops’ Conference of the Philippines (CBCP).
Sa mensahe nga gipadala sa CBCP, nag-ampo ang Santo Papa nga unta giyaon sa Espiritu Santo ang mga diskusyon ug mga desisyon sa mga obispo.
Gibasa ni Archbishop Charles Brown, apostolic nuncio sa Pilipinas, ang mensahe sa Papa sa pagbukas sa plenary assembly.
Samtang personal nga gihatod ni Cardinal Pietro Parolin, Vatican Secretary of State, ang mga pangumusta sa Santo Papa ug gihatag ang Apostolic Blessing isip timaan sa komunyon ug kalinaw.
Gibug-aton sa mensahe sa Santo Papa ang kahimtang sa milyon-milyong Pilipinong nagtrabaho sa gawas sa nasud, ug gihangyo ang mga magtutuo nga magtinabangay, magbahin sa ilang grasya, ug mag-alagad sa mas lapad nga Kristohanong komunidad.
