GIPASIDAAN sa Catholic Faith Defenders Cagayan de Oro ang publiko batok sa nagkadaghang kaso sa pornograpiya ug online gambling nga giingong naghulga sa moral ug espirituhanong kahimtang sa mga magtutuo ilabina karong panahon sa pagpuasa.
Miingon si Wendel Talibong sa CFD-CDO nga dili lamang pagkaon ang angay likayan sa Kwaresma, kundili labaw sa tanan ang mga online nga bisyo nga dali ma-access pinaagi sa cellphone ug internet.
Gipasabot niya nga ang pornograpiya makadaot sa panglantaw sa tawo sa dignidad ug kaputli, samtang ang online gambling mahimong mosangpot sa pagkaadik ug problema sa pinansyal.
Dugang niya, ang sayop nga paggamit sa digital space mahimo usab nga maagian sa ubang negatibong impluwensya sama sa bayolenteng dula, horror nga salida, ug musika nga adunay dautang mensahe.
Busa, gihangyo sa CFD-CDO ang mga magtutuo nga gamiton ang Kwaresma isip panahon sa paghinulsol, pagdisiplina sa kaugalingon, ug paglikay sa mga online nga kalihokan nga makadaot sa espiritu ug pamatasan. (James Oliver)
