CAGAYAN DE ORO CITY-Gikasuhan na sa paghupot sa gidiling droga ang forceclip operator dihang nasikop sa kapolisan sa pantalan sa Ozamiz City.
Giila ni Ozamiz City Police Office commander C/Insp Jovie Espenido ang suspek nga si Julio Navarro,hingkod ang panuigon ug 12 ka tuig nang nagtrabaho sa pantalan sa maong lugar.
Miingon si Espenido nga nasikop si Navarro dihang nakuhaa’g dako nga putos sa suspected shabu nga gisulod sa ‘bayong’ gikan sa Cebu City nga gisakay nga barko sa Cokaliong Shipping Lines.
Dugang ni Espenido nga si Navarro ang usa sa mga hinungdan kon nganong pabiling nasudlan sa kinilo nga ilegal nga droga ang Ozamiz City bisan nabungkag na ang Parojinog Syndicate Drug Group.
