CAGAYAN DE ORO CITY – Gilayong gipangbaklas sa city general services office ang nagkatag nga election posters diin nakatatak ang hitsura ug pangalan ni Misamis Oriental 2nd District Board Member Gerardo Sabal III sa pipila ka bahin sa syudad.
Namahayag si Janboy Actub,tigpamaba ni City Mayor Rolando ‘Klarex’ Uy nga trabaho sa maong buhatan nga hipuson ang tanang posters nga walay pagtugot gikan sa city govt.
Siya miingon nga dili usab makompirmar sa city hall kon nasayod ba si Sabal nga nagkatag ang iyang political materials o hinimuan lang kini sa supporters niini.
Giklaro ni Actub nga dili pagpihig sa mga personalidad nga gustong mohimo’g public exposure apan angay mosubay sa proseso kay dunay gabayan niini nga gipatman ang city govt sa dugay nang panahon.
Si Sabal ang tipik sa gi-endorso ni Misamis Oriental Provincial Gov. Peter Unabia nga ipadagan pagka-konsehal sa 2025 elections sa dakbayan.
Sa pagkutlo ning balita, wala pa makahatag sa iyang katin-awan o panig si Sabal kabahin sa maong isyu.
