CAGAYAN DE ORO CITY – Dungan nga nanumpa isip bag-ong mga miembro sa Partido Federal ng Pilipinas (PFP) ang potential political rival nga sila kanhi Phividec administrator Jose Gabriel ‘Pompee’ La Viña ug incumbent City Mayor Rolando ‘Klarex’ Uy sa syudad sa 2025 elections.
Kini human pulos imbitara ang duruha aron mahimong bag-ong sakop sa PFP nga gipanguluhan ni President Bongbong Marcos atol sa ilang katiguman sa kauluhan kagahapong adlawa.
Una nang namahayag si Klarex nga magpasubli pagka-mayor samtang si Pompee ang dugay na usab nagbutyag nga modagan pagbalik.
Si Klarex ug Pompee ang unang nagka-kontra pagka-mayor sa syudad sa 2022 elections.
Nanganti si La Viña nga pildihon na niya si Klarex sa ikaduha nila nga bangga sa pagka-mayor sa 2025 elections.
Apan gibutyag lang ni Klarex nga labing maayo nga daghan sila nga mag-kontra pagka-mayor aron makapili’g ensakto ang katawhan sa adlaw sa piliay.
Samtang gitoohan nga laing puwersa usab ang grupo ni kanhi City Mayor Oscar Moreno nga nagtinguha paghukas katungdanan ni Klarex.
Si Moreno ug Klarex ang dugay’ng magka-alyado sa politika apan tungod sa ilang tagsa-tagsa ka deperensiya sa panglantaw ug baruganan sila nagkabugto ang mga dalan.
