CAGAYAN DE ORO CITY – Gipaniguro sa kapolisan nga mahatagan sa igong seguridad ang mga kandidato ug kasamtangang elected government officials nga molambigit sa taliabot 2025 elections sa Northern Mindanao.
Kini maoy sulti ni Police Regional Office 10 Director Brig Gen Jaysen de Guzman nunot sa iyang pagpuli sa gibakanteng puwesto sa nag-retiro na sa trabaho nga si Police Brig Gen Ricardo Layug Jr sa Camp Alagar sa syudad kagahapong adlawa.
Miingon si De Guzman nga kabahin kini sa prioridad nga ipatuman sa Camp Alagar nga una nang nasugda’g prepara ni Layug sa miagi pang mga bulan.
Gusto sa bag-ong lingkod nga heneral nga luwas ang tanang aktibong molambigit sa piliay sunod tuig.
Hinoon, itandi sa ubang mga rehiyon sa nasud kabahin ang Northern Mindanao nga dunay malinawon nga kahimtang sa matag-lusad sa piliay.
Hisayrang sugdan ang pagduso’g certificate of candidacy o COC sa mga gustong mokandidato sugod petsa 1 hangtod Oktobre 8 ning tuiga.
