Gipasanginlan sa Pransiya ang Islamic Revolutionary Guard Corps (IRGC) sa Iran nga maoy responsable sa serye sa cyberattack nga miresulta sa pagsaka sa temperatura sa mga refrigerator ug freezer sa mga supermarket sa tibuok nasud niadtong Oktubre 11 ug 12, 2026.
Matud ni French Foreign Minister Jean-Noël Barrot, ang maong pag-atake kay wala pa nila sukad masinati kaniadto, samtang misaad ang kagamhanan nga ipahamtang ang mga silot sa mga responsableng nagpaluyo niini.
Gihatagan usab og gibug-aton ni Barrot nga kini ang unang dinagkong cyberattack nga nagtumong sa pagsabotahe sa nasudnong teritoryo sa Pransiya, hinungdan nga gipatawag sa kagamhanan ang embahador sa Iran sa Paris aron ipahayag ang ilang kusog nga protesta batok sa maong insidente.
Sumala sa mga imbestigador, mikabat sa 700 ka establisemento ang naapektuhan sa maong pag-atake, diin kontrolado sa mga hacker ang mga sistema sa pagpabugnaw pinaagi sa internet ug gipataas ang temperatura sa pipila ka refrigerator ug freezer ngadto sa 50 degrees Celsius sulod sa mga unom ka oras, nga miresulta sa pagkadaot sa daghang presko ug frozen nga mga pagkaon. (raniel mahunyag)
