CAGAYAN DE ORO CITY – Wala na makaabot sa pag-obserbar sa pinaka-importanteng bahin sa semana santa ang batan-ong babaye nga video blogger epekto sa wala damha nga kamatayon niini tungod sa self-accident sa Brgy Dayawan,Villanueva, Misamis Oriental.
Kini human kompirmaha ni Villanueva LGU spokesperson Cyril Cambalon Jr nga narespondehan nila ang pagka-disgrasya-patay sa biktima nga si Relyn ‘Powerpuff 2.0’ Pepito,23 anyos ug samaron ang iyang kaubang menor de edad gumikan sa nahulog sa kanal nga gisakyang motorsiklo sa milabay’ng gabii.
Sumala ni Cambalon nga posibleng mihimo’g pagpasiyo ang duruha ug sa ilang pagpauli,kalit nga nadisgrasya ang gisakyang motorsiklo diin sila nahulog sa kanal.
Siya miingon nga walay grabeng samad naangkon ang biktima apan nabantayan nga adunay bukol sa agtbang nga hayan nalabay pipila ka metros gikan sa porsyon nga sila nadisgrasya.
Gilayong gidala nila sa pribadong ospital sa lungsod sa Tagoloan ang biktima diin nabantayan nga nagsuka na’ dugo apan wala ma-admit kay giingong nangayo’g dakong kantidad sa salapi isip down payment.
Tungod kay walay igong kantidad sa salapi ang kauban sa biktima rason nga gidali’g dala sa laing ospital padulong sa syudad apan wala na masalbar pa.
Gumikan sa gipatuman nga palisya sa ospital,miani kini’g grabeng pagsaway sa social media kay mas giuna ang salapi kay pagsalbar sa kinabuhi.
Nasuta usab nga usa ka bulan nang nagmabdos ang biktima kinsa naila sa iyang pagsilbing batan-ong vlogger.
