The more we look, the more we investigate, the more we find! Mao kini ang tubag ni Presidente Ferdinand Marcos Jr. sa dihang gipangutana siya kung unsa na kalalom ang ilang nabuhat alang sa pagpaimbestiga sa kontrobersyal nga flood control scandal sa nasud.
Sa nahitabong pressconference kagahapong adlawa, gipamatud-an sa presidente nga ang maong anomaliya naglambigit og gatusan ka bilyong pesos ug nagsugod pa niadtong tuig 2017 ug 2018, layo pa sa iyang kasamtangang administrasyon.
Gikumpisal sa lider nga usa sa pinakalisod nga babag sa iyang administrasyon mao ang kultura sulod sa gobyerno, diin giisip sa uban nga katungod na nila ang pagdawat og kickback gikan sa pundo sa publiko.
Bisan pa niini, hugot ang iyang barog nga padayon silang maningkamot sa pag-usab sa maong sistema ug sa pagpangita og tulubagon batok sa mga nalambigit.
