Dili gusto ni Pres Bongbong Marcos nga mohimo’g impeachment proceedings ang liderato ni House Speaker Martin Romualdez batok kang Vice Pres Sara Duterte.
Kini bisan kon gisulsulan sa mga alyado si Marcos nga angay kasuhan sa impeachment case si VP Sara nga unang nagbahad sa iyang kinabuhi kon mamatay man siya epekto sa bangi sa politika.
Gihimo ni Marcos ang pahayag nunot sa giingong mihungaw nga text message niini sa pipila ka kadagkuan sa kamarabaha.
Miingon ang presidente nga walay maayong makuha apan magkabahin-bahin lang ang katawhan sa naghingusog nga ipa-impeach ang iyang bise-presidente.
Siya miingon nga dili importante si Sara apan mas angay tutukan ang paghaw-as sa katawhan nga nag-atubang sa daghang suliran sa nasud.
Una nang gitoohan sa publiko nga grabe ang pagguba kang VP Sara pinaagi sa mga imbestigasyon aron gamiton nga basehan sa pagduso’g impeachment case sulod ning tuiga.
Apan dili pa kumbinsido ang katawhan kon tinud-anay nga buhaton kini sa administrasyon nga dili na ipalagpot sa katungdanan si VP Sara.
Kini tungod kay nadumduman usab nila ang saad ni Marcos nga ipabalik sa tag-20 pesos sa kilo sa bugas apan pabiling wala nahatagan sa katumanan.
Dugtong niini,mikatag ang mga impormasyon nga gikasuko sa Makabayan Block ug gisaway si Marcos kon nganong manghilabot sa trabaho sa kamarabaha batok VP Sara.
Daghang imbestigasyon batok VP Sara ug may pasiunang mga pagkaso batok kaniya nunot sa death threat kontra sa unang pamilya sa nasud.
Sa pagkutlo ning balita, wala pa’y komento si Romualdez kalabot sa baruganan ni Marcos.
