Giakusahan ni kanhi Senador Antonio Trillanes IV si Interior Secretary Jonvic Remulla nga posibleng pakaapekto sa operasyon sa mga otoridad batok kang Senador Ronald “Bato”Dela Rosa tungod matud pa sa dili tukma sa panahon nga pagpagawas niini og impormasyon ngadto sa publiko.
Sa ekskulisbong pakighinabi sa Bombo Radyo Philippines, mipahayag si Trillanes nga basi sa mga impormasyon nga nakaplagan nila kaniadto, anaa sa Davao Region si Dela Rosa.
Bisan pa niini, gipamugos sa kanhi Senador nga nabulilyaso ang tracking operations human sa sunod-sunod nga pagpahigayon og press-conference ni Remulla nga matud pa naghatag og higayon sa kampo sa Senador nga mahibaw-an ang mga lakang sa mga otoridad.
Tungod niini, gikuwestiyon ni Trilanes ang papel sa kalihim sa mga operasyon ug wala niya giwagtang ang posibilidad nga dunay mapadangat nga impormasyon sa kampo ni Dela Rosa bahin sa ilang pagpangita.
Gisaway pag-usab sa kanhi Senador ang lakang ni Remulla bahin sa 50 milyon pesos nga ganti alang sa impormasyon nga makatabang sa pagkasikop ni Dela Rosa.
Matud ni, angay unta kining gipahibalo niadtong Nobyembre 2025, sa dihang unang nakuha ang impormasyon bahin sa arrest warrant batok sa Senador. (raniel mahunyag)
.jpg "Usec. Castri, gipamugos nga ang pagpang-apod-apod sa kasamtangang administrasyon sa mga pondo ug hinabang ngadto sa mga LGU kay walay gipihigan")
