Gipasalig ni Presidente Ferdinand Marcos Jr. nga gisiguro sa kagamhanan nga mahimong luwas, hapsay, ug komportable ang pagbiyahe ug pagpangduaw sa mga katawhan sa ilang mga minahal sa kinabuhi karong panahon sa kalag-kalag.
Matud ni Marcos, nagpahigayon ang Department of Transportation ug uban pang mga ahensya og lapad ug hugot nga inspeksyon sa mga tugpahanan, pantalan, ug terminal sa bus aron masiguro ang kaluwasan sa mga pasahero.
Dugang pa sa Presidente, gisiguro na usab nila nga dunay igong masakyan ang mga katawhan, diin nanghatag na og kapin sa 1,000 nga special permit ang LTFRB alang sa mga dugang nga bus ug magpagawas usab ang MARINA og relaxation order ug special permits sukod niadtong Oktubre 29 padulong sa Nobyembre 3.
Miingon usab ang presidente nga ilang gisigurong dunay igong kawani ug walay bakante nga immigration counter sa mga tugpahanan.
Aron masiguro ang kaluwasan sa mga pasahero kay magpahigayon og inspeksyon ang nagkalain-laing ahensya sa mga lugar diin modagsa ang katawhan, sama sa sementeryo ug simbahan.
Dugtong niini, gipadayag usab sa Presidente nga nakaandam na usab ang mga balay tambalanan, health emergency teams, ug kagamhanan aron diha-diha dayong makarespondi kon ugaling adunay emerhensiya. (raniel mahunyag)
