“I prefer not to answer, Your Honor,” mao kini ang gipahayag sa ikaupat nga testigo sa depensa nga si Atty. Suzette Balucanag-Punay sa pag-cross-examine ni House private prosecutor Atty. Lorna Kapunan kaniya.
Nahitabo kini sa dihang gipangutana ni Kapunan ang testigo kung gidili ba sa Konstitusyon sa Bise Presidente nga modawat og uban pang suholan gawas sa iyang suweldo isip ikaduhang pangulo sa nasud.
Inay nga direktang tubagon ang maong pangutana, miingon si Balucanag-Punay nga dili niya kini gustong tubagon.
Tungod niini, gipahinumdoman ni Presiding Officer Francis “Chiz” Escudero ang witness nga lahi ang wala siyay kahibalo gikan sa pagpili nga dili motubag sa usa ka pangutana.
Sa kadugayan, gibag-o ni Balucanag-Punay ang iyang tubag ug gipadayag nga wala siya makabalo sa tubag sa maong pangutana.
Ang maong pagpangutana kay dungan sa ilang pagtuki sa mga salapi nga nadawat matud pa ni Duterte gikan sa iyang mga investment, lakip na niini ang gitahong P46,875 nga puhunan sa Davao Bounty Times Food Corporation nga mibalik matud pa og 2.14 milyon pesos. (raniel mahunyag)
