Gilauman ang pagsaka sa presyo sa diesel ug kerosene, samtang mokunhod usab ang presyo sa gasolina sa umaabot ng adlaw sa Martes, Oktubre 27, subay sa mga banabana base sa paglihok sa presyo sa lana sa merkado sa tibuok kalibutan.
Base sa upat ka adlaw nga pagbaligya sa merkado sa kalibotan, posibleng mosaka og ₱2.50 hangtud ₱3.50 matag litro ang diesel ug ₱0.50 hangtud ₱1.50 matag litro ang kerosene, samtang mokunhod og ₱0.50 hangtud ₱1.50 matag litro ang gasolina.
Atol sa pagbaligya sa merkado gikan Oktubre 19 hangtud 23, misaka og ₱3.30 matag litro ang presyo sa diesel ug ₱1.90 matag litro ang kerosene, samtang mikunhod og ₱0.70 ang matag litro sa gasolina.
Dugtong niini, gilauman usab ang pagsaka sa presyo sa liquefied petroleum gas (LPG) sa umaabot nga bulan sa Nobyembre, nga posibleng modugang og ₱3 hangtud ₱4 matag kilo, o katugbang sa ₱33 hangtud ₱44 matag regular nga tangke. (raniel mahunyag)
