CAGAYAN DE ORO CITY, Philippines – Nabati na sa mga konsumante sa La Union ang pagmahal sa presyo sa karneng baboy.
Segun sa Philippine Statistics Authority, gikan sa 1.5 % nga increase sa Hunyo, misaka pa sa 2.4% ang pag-usbaw sa presyo sa kinilo nga karne.
Gitumbok ni PSA La Union chief statistical specialist Dr. Danites Teñido ang pagkuyanap sa African Swine Fever (ASF) ang pinakahinungdan sa pagnihit sa supply sa karneng baboy, samtang nagsaka ang demand sa ilang munisipyo.
Gumikan niini, ang kasamtangang presyo sa usa ka kilo nga karneng baboy mapalit na sa tag P300-P320.
Niadtong Hunyo, mapalit lamang ang usa ka kilo sa 297 pesos.
Kahinumduman nga misumada na sa 132 hog raisers ang apektado sa ASF.
Kinatibuk-ang 704 ka baboy ang ilang gipatay sukad Agosto 17, ning tuiga.
