CAGAYAN DE ORO CITY, Philippines – Gipalihok ni Department of Trade and Industry Secretary Alfredo Pascual ang ilang monitoring team aron susihon kung nagsunod ba ang mga supermarkets ug groceries sa pagpatuman sa price freeze sa mga lugar nga gideklarar ubos sa state of calamity tungod sa bag-ong Carina ug Habagat.
Ubos sa Price Act, ang tanang basic necessities otomatik nga ipaubos sa price freeze o walay paglihok sa kasamtangang presyo sulod sa 60 ka adlaw aron mapanalipdan ang mga konsumidor gikan sa mapahimuslanong pagsaka sa presyo sa mga palaliton panahon sa kalamidad.
Lakip sa mga batakang panginahanglanon nga gibantayan sa DTI mao ang presyo sa pan, canned fish ug ubang produkto sa dagat, bottled water ug containers, processed milk, locally manufactured instant noodles, kape, asin, laundry detergent, detergent ug kandila.
Gisaad ni Secretary Pascual nga iseguro nga magpabiling barato ug accessible sa tanang apektadong residente ang mga batang palaliton.
Gitin-aw DTI nga mag-atubang sa tukmang silot sama sa pagkabilanggo ang mapamatud-ang makalapas sa balaod, lakip na ang mga nalambigit sa ‘profiteering’ ug ‘hoarding’ sa mga lugar nga anaa sa state of calamity.
Mahimong i-report sa mga konsumidor ang mga tindahan nga overpricing sa ilang mga baligya pinaagi sa Consumer Care hotline sa DTI sa 384 o sa email sa ahensya sa consumercare@dti.gov.ph.
