CAGAYAN DE ORO CITY – Gibaharan karon ni City Mayor Oscar Moreno ang mga pribadong laboratoryo nga manubag kon mohimo’g rapid test sa mga suspected patient sa COVID-19 nga walay koordinasyon sa syudad ug Dept of Health-10.
Gihimo ni Moreno ang hait nga pasidaan tungod sa duha ka private laboratories nga mi-akomodar sa rapid test sa mga empleyado nga kompanya diin may lima ka pasyente ang positibo hinungdan nagkagubot ang katawhan sa Brgy Bonbon sa syudad.
Miingon si Moreno nga gitahasan niini ang City Health Office aron kuhaon ang tubag kon nganong dili sila angay silotan sa pagbalewala nila sa dakbayan.
Samtang gikompirmar ni City Health Office epediomologist Dr Joselito Retuya nga nasubay na nila ang lima ka pasyente nga positibo sa rapid test kontra coronavirus disease sa syudad.
Kini human mismo ang maong mga positibong pasyente ang nanawag kanila aron mangutana sa angay nila buhaton.
Miingon si Retuya nga gitakdang isulod sa city isolation unit ang maong mga pasyente aron ipaubos sa obserbasyon kon magpakita sa grabeng sintomas sa bayrus.
