CAGAYAN DE ORO CITY – Giangkon sa private prosecutor nga si Atty Nena Santos nga mas namiligro na ang ilang kinabuhi sa paghawid sa kasong multiple murder batok sa mga utok sa Maguindanao masaker.
Kini bisan nga naangkon sa mga biktima ang inisyal nga kadaugan batok sa mga Ampatuan diin gihukman sa korte nga sad-an sa maong ngilngig nga kremin.
Miingon si Santos nga makapila kining nagbalhin-bahin sa pinuy-anan aron lamang dili makuha sa mga tawo nga gisugo sa mga Ampatuan aron siya ipalikida.
Dugang ni Santos nga wala nila wad-a ang dakong posibilidad nga mosamot ang kasuko sa mga Ampatuan ug mohimo’g pagpanimalos sa mga biktima ug kanila nga mga abogado sa kaso.
Samtang mohimo’g apelasyon ang kampo ni kanhi Datu Unsay Mayor Andal Ampatuan Jr sa Court of Appeals ug sa Korte Suprema kon gikinahanglan sa guilty verdict nga gipakanaug sa korte.
Miingon ang abogado ni Ampatuan nga si Atty Paul Laguatan Jr nga ihagit nila ang hukom sa korte aron mahatag ang pabor nga rekonsiderasyon sa kaso nga maglibre kang Ampatuan.
Si Ampatuan kinsa mao untay ikatigi kaniadto pagka-gobernador ni kanhi Buluan Vice Mayor Esmael ‘Toto’ Mangudadato ang nakit-an sa mga testigo nga nangunay pagpatay sa mga biktima ayha gipanglubong sa bukiran sa Maguindanao.
