CAGAYAN DE ORO CITY – Nasanta sa Police Regional Office 10 ang 112 ka indibidwal nga walay pagduha-duha nga misupak sa gipatuman sa Commission on Elections sa ‘gun ban’ sukad gipaubos ang Northern Mindanao election period sugod Enero 12 hangtod Hunyo 11 ning tuiga.
Kini ang gitaho ni PRO 10 spokesperson Major Joann Navarro subay sa na-kolekta nga mga datos gikan sa lower units kabahin sa pagpatuman sa balaod diin 104 ka klase-klaseng armas ug 795 ka lain-laing mga bala nga gihuptan sa mga dinakpan.
Siya miingon nga nangakasuhan na ang maong mga dinakpan.
Gibutyag ni Navarro nga dako’g natabang ang pagka-aresto sa mga suspek aron makibhangan ang election related incidents nga matigayon sulod sa rehiyon.
Apan namahayag si PRO 10 regional director Brig Gen Jaysen De Guzman nga wala nagpasabot nga hupas na ang gun ban nga magpasagad na lang ang katawhan nga magkupot sa mga armas.
Kini tungod kay mohimo gihapon ang kapolisan sa pagsumpo sa loose firearms.
Siya miingon nga angayang mokuha sila sa ensaktong mga papeles aron makahupot ug makadala sa armas nga protektado sa balaod.
