CAGAYAN DE ORO CITY – Walay natala ang kapolisan nga dili maayong mga panghitabo nga makabalda sa mga aktibidad sa simbahang Katoliko sa pag-obserbar sa semana santa.
Kini subay sa gilugwa nga impormasyon gikan sa tactical and operation center sa Police Regional Office 10 sa Camp Alagar ning syudad.Namahayag si PRO 10 spokesperson Maj Joann Navarro nga nagsilbing generally peaceful ang pag-obserbar sa mga deboto sa milabay’ng Huwebes Santo ug Biyernes.
Kabahin sa gihataga’g igong pagtagad sa PNP kuyog ang AFP ang posibleng mga pagpanghasi o sabotahe sa mga terorista sa vital installations sa gobierno ug ang mga lugar diin dagsa ang katawhan kay anaa sa pagpamalandong dinhi sa rehiyon.
Samtang gikompirmar usab ni City Police Director Col. Salvador Radam kon unsa ka malinawon ang sitwasyon samtang gidumdom sa katawhan ang pasyon,pagpasakit ug pagpakamatay ni Kristo-Hesus ning semana santa.
Kini human personal gisusi ni Radam ang aktuwal nga mga kalihukan gikan sa simbahan padulong sa pilgrimage sites nga naglakip sa Guadalupe sa tri-boundaries sa Tablon,Agusan ug Balubal ingon ang bukid sa Malasag sa Brgy Cugman.
Namahayag si Radam nga sundon lang gyud sa mga deboto ang gihan-ay nga gabayan sa city govt aron walay kasilik-an sa ilang pamalandong ug pabiling luwas sa sabotahe ang dakbayan.
Sa pikas bahin,nagbaton sa zero holyweek related incidents ang konseho sa Brgy Tablon diin sagad gaagi ang mga deboto pagsaka sa Our Lady of Guadalupe Shrine nga nakabase sa Brgy Balubal ning syudad.
Miingon si Tablon Punong Brgy Romeo Bacarro nga epekto kini sa hugot nga pagbantay sa puwersa sa gobierno ilabina ang pagtabok sa siyam ka gagmay’ng sapa padulong sa kapilya.
Subay sa inisyal nga ihap sa mga nakasaka nga deboto,anaa sa12-mil ang misaka sa Guadalupe samtang kapin nilibo usab sa Malasag kagahapong adlawa adlawa lamang.
Samtang bisan ang provincial govt sa Camiguin nga gipanguluhan ni incumbent Gov. XJ Romualdo ang inisyal usab nagkupot sa malinawon nga kahimtang taliwala sa pagdagsa sa mga deboto ug mga turista ning semana santa.
Kini human walay bisan unsa nga dugu-ong natala nga hitabo sa isla nga nabantog nang daan nga malinawon sa tibuok rehiyon sa Northern Mindanao.
Namahayag si Camiguin Police Provincial Office spokesperson Police Maj. Guillermo Hamot nga tuyo sa kahugot sa ilang seguridad nga masiguro nga walay mga deboto ug mga turista nga mabalda sa himoon nila nga pagpanaad ning semana santa.
Hisayrang ilado sa matag-semana santa ang Camiguin nga dunay mga deboto nga mohimo’g pagtuyok sa tibuok isla isip ilang panaad.(Mga hulagway kuha ni Ms Aicy Soriano/Rolando A. Uy FB page).
