CAGAYAN DE ORO CITY – Dili pa makompirmar sa Police Regional Office 10 ang mikatap nga impormasyon nga upat ka pulis nga mga babaye ang giingong patay sa pagka-disgrasya sa ilang gisakyan nga patrol car sa Brgy Napangan,Don Victoriano,Misamis Occidental kaganihang udto.
Gibutyag ni PRO 10 spokesperson Major Joann Navarro nga maoy iyang makompirmar nga anaa sa pito ka pulis ug laing tulo ka sibilyan ang sakay sa sakyanan dihang nadisgrasya.
Siya miingon nga likayan una nila ang paghatag sa dugang impormasyon hangtod nga makahupot sa tukmang kasayuran gikan sa mismong mga kauban nila sa Misamis Occidental Police Provincial Office nga maoy gitahasan sa subsob nga imbestigasyon.
Dugang sa opisyal nga wala pa sila’y gilugwa nga impormasyon nga adunay namatay sa maong disgrasya kay kamulo pa ang gihimong imbestigasyon.
Una nang nanggawas ang impormasyon nga nag-escort ang mga biktimang pulis sa organizer sa Bb Pilipinas nga anaa sa Misamis Occidental dihang natigayon ang disgrasya kaganihang udto.
