CAGAYAN DE ORO CITY – Gihagit ni Misamis Occidental Gov Henry Oaminal si Police Regional Office 10 Director Brig Gen Benjamin Acorda Jr nga pagduso’g sayo sa retirement isip pulis sa nasud.
Kini human wala pa gihapon malimti ni Oaminal ang pipila ka gihimong lakang sa mga pulis nga kontra sa iyang kagustuhang mahitabo sa milabay’ng election period sa ilang lugar.
Gibutyag ni Oaminal nga inotil si Acorda sa pagdisiplina sa iyang pipila ka police officials nga nakahimo’g kalapasan sa ilang propesyon ug paghatag pabor sa iyang kaatbang sa May 9 elections.
Maoy hugot nga nakaatbang ni Oaminal sa pagka-gobernador si kanhi Misamis Occidenal Gov. Philip Tan nga gikan sa Tangub City.
Samtang gihimakak ni Acorda ang tanang pasangil gikan sa kampo ni Oaminal.
Miingon si Acorda nga nagtrabaho lamang sila aron pagmintinar sa kahusay’g kalinaw sa maong lalawigan ug wala usab kini katungod nga mobati’g kayugot ngadto sa gobernador.
Miingon si Acorda nga nakaandam usab kini makigtagbo kang Oaminal aron sulbaron kon unsa man ang wala pagsinabot nila sa ilang tagsa-tagsa ka trabaho.
Hisayrang usa sa mga dagkong hitabo sa wala pa ang May 9 elections ang pagkapusili-patay ni late Lopez Jaena Mayor Michael Gutierrez sa dihang wala maigo sa sniper si Oaminal nga giingong target patyon sa Tangub City sa miaging Disyembre 2021.
