CAGAYAN DE ORO CITY – Nagkanipis ang anggulo kabahin sa bangi sa politika ang rason kung nganong gidauban sa wala ilhing mga responsabli ang media van ni kanhi Cagayan de Oro Press Club president Dr. Manny Jaudian gawas sa ilang pinuy-anan sa lungsod sa Sagay,Camiguin sa miaging semana.
Kini human isugilon ni Police Regional Office 10 spokesperson Major Joann Navarro sa Bombo Radyo interview nga lisod madugtong ni Jaudian nga tungod sa politika ang gidangatan sa iyang sakyanan.
Kini tungod kay walay bisan kinsa nga politiko nga gipaluyuhan ug gikaatbang ang maong media practitioner sa isla rason lisod makonektar nga kalabutan sa politika ang nag-unang motibo niini.
Gibutyag ni Navarro nga gihulat pa nila ang resulta sa imbestigasyon sa Bureau of Fire Protection kung ma-establisar ba ang motibo sa arson o tinuyo ang pagsunog sa maong salakyan.
Una niini,nagtoo ang kasamtangang COPC officials nga politika ang nag-unang tuyo pagsunog sa media van ni Jaudian sanglit kanhi kini kandidato sa dakong katungdanan batok sa kasamtangang namunuan sa isla apan sobra dekada na ang milabay.
Hisayrang sa pagbuto sa hitabo,gilayong gipatabok ni PRO 10 regional director Brig Gen Jaysen de Guzman ang usa ka team gikan sa PNP-CIDG aron mangunay pag-imbestigar sa gitoohang media attack nga nahitabo sa probinsya.
