Duha pa lamang ka adlaw human sa iyang opisyal nga paglingkud, gilayon nga nagpatrolya sa kadalanan ug mga dunggoanan sa Cagayan de Oro City ang bag-ong namunoan sa Police Regional Office 10 nga si Police Brigadier General Nestor Babagay Jr.
Tungod niini, gipahigayon sa bag-ong opisyal ang pagsusi sa mga listahan sa blotter sa Police Station 5 aron masiguro nga mahatagan og madasigong aksyon ang matag kaso ug aron magiyahan ang mga kapolisan sa ilang ginabuhat.
Usa sa mga prayoridad sa bag-ong opisyal mao ang pagsusi sa mga insidente ug mga reklamo diin nalambigit ang mismong mga sakop sa kapolisan aron masiguro nga adunay manubag ug dili mapakyas ang paghatag og hustisya.
Aron masiguro ang kaluwasan sa publiko, nimando usab si General Babagay sa tanang commanders nga mogawas sa ilang mga opisina ug magpakita sa kadalanan, labi na sa mga terminal sa bus ug pantalan diin daghan ang mga biyahero.-
