CAGAYAN DE ORO CITY – Wala gikahimoot sa liderato sa Police Regional Office 10 ang gilugwa nga travel advisory sa Canadian Embassy kabahin sa kahimtang sa seguridad sa Mindanao nga na naglakip dinhi sa syudad ug lalawigan.
Kini human giabisuhan sa embahada sa Canada ang ilang nationals nga likayan ang pagbiyahe padulong sa 17 ka probinsya sa Mindanao diin tipik ang pipila ka lugar sa Northern Mindanao.
Miingon si PRO 10 Director Police Brig Gen Ricardo Layug Jr nga gihagit nila ang taga-embahada sa Canada nga dili kutob lang sa pagguba sa imahen sa Mindanao apan personal modalikyat ilabina dinhi sa rehiyon aron mismo sila makasinati sa kahusay’g kalinaw niini.
Tipik sa basehan sa travel advisory sa Canada ang pagpamomba sulod sa Mindanao State Univeristy Marawi City diin mikalas sa upat ka sibilyan niadtong Disyembre 2023.
Samtang angayang ipasulbad ug mahatagan sa hustisya ang mga biktima sa pagbuto sa bomba sulod sa Mindanao State Univerity Main Campus sa Marawi City, Lanao del Sur.
Kini ang sugyot ni kanhi City Mayor Oscar Moreno kinsa makaduhang higayon usab nga nahimong chairman sa Regional Peace and Order Council o RPOC dinhi sa rehiyon.
Miingon si Moreno nga katungod sa Canadian govt nga mahatagan sa seguridad ang ilang katawhan rason nga dili sila angay mabasol sa gilugwa nga travel advisory.
