CAGAYAN DE ORO CITY – Gisugdan na sa pagpakatag sa Police Regional Office 10 ang puwersa nga mohatag-seguridad sa katawhan nga moagi sa nagkadaiyang pantalan,bus terminals,tugpahanan alang sa ilang pagduaw sa mga mahal sa kinabuhi nga mihalin na sa laing kalibutan.
Kini alayon sa pagtamod sa duha ka adlaw nga holidays agi’g paghatag bili sa adlaw sa mga santos ug kalag sa mga Kristiyanos.
Miingon si PRO 10 spokesperson Major Joann Navarro nga ubos sa heightened alert status ang Northern Mindanao diin nagkatag ang halos 4-mil ka security personnel nga naglakip sa mga sundalo,Philippine Coast Guard ug force multipliers hangtod sa petsa 2 sa Nobyembre ning tuiga.
Kini sa pagsiguro nga luwas ang katawhan nga mohimo sa ilang mga obligasyon alayon sa maong kasaulugan ug pagdumdom sa mga kalag.
