CAGAYAN DE ORO CITY – Gipa-imbestigaran sa Police Regional Office 10 sa PNP-CIDG ang isyu nga tinuyo nga pagsunog sa media van ni kanhi COPC president Dr. Manny Jaudian sa lungsod sa Sagay,Camiguin.
Kini human mibati’g grabeng alarma ang mga opisyal ug mga miembro sa Cagayan de Oro Press Club sa media attack nga nasinatian ni Jaudian gikan sa wala pa ilhi nga mga responsable sa miaging Sabado sa kadlawon.
Miingon si COPC Pres. Froilan Gallardo nga gilayong gitawag nila ang atensyon sa PRO 10 ug Presidential Task Force on Media Security o PTFoMS aron paspas maimbestigaran ang hitabo.
Una niini,namahayag si Jaudian nga sa wala pa ang hitabo,nabantayan nga adunay katingad-an nga mga tawo nga lulan sa motorsiklo nga naglabay-labay sa lokasyon sa iyang sakyanan.
Hisayrang bisan ang kampo sa kasamtangang administrasyon ang naghangyo usab sa kapolisan nga paspason ang imbestigasyon aron dili madaot ang imahen sa Camiguin.
