CAGAYAN DE ORO CITY – Maghatag unta’g leksyon sa mga pulis nga magmatngon sa ilang trabaho ang pagka-konbikto sa lima nila ka kanhi kauban tungod sa kasong kidnapping sa negosyante sa syudad.
Miingon si Regional State Prosecutor Merlynn Uy nga dili lisensiya ang tsapa ug uniporme aron mohimo na ang pipila ka pulis sa mga gimbuhaton nga dakong supak sa balaod.
Namahayag ang abogada nga tungod sa lig-ong ebedensiya nga kuha sa CCTV camera,nadutlan sila kanhi Police Sr Inps Irenio Ramirez;PO2 Alejandro Ubanan;PO2 Sangkulan Hussien;SPO2 Alaindelon Tacubao ug SPO2 Jojo Lim kasong kidnapping tungod sa pagdagit nila sa biktima nga si Enrique ‘Eking’ Fernandez III sa tuig 2016.
Misulay pa’g duso sa piyansa ang maong mga pulis apan pagka-priso sa tibuok kinabuhi ang gisilot ni RTC Branch 17 Presiding Judge Ana Candida Casiño kanila sa miaging adlaw.
Samtang gidawat sa liderato sa Police Regional Office 10 ug gihatagan sa taas nga pagtahod ang hukom sa korte nga pagkonbikto sa kanhi nila lima ka pulis nga nag-atubang sa kasong kidnapping ning syudad.
Miingon si PRO 10 spokesperson Police Maj. Joann Navarro nga nagmatuod lamang kini nga dakong buhi ang hustisya alang sa mga nilupigan.
Siya miingon nga walay luna ang bisan kinsa nila nga kauban nga mohimo’g pagpakaulaw ug modagman sa integridad sa PNP.
Hisayrang unang gipatoo sa grupo ni Ramirez nga lehitimo nga police operation ang ilang pagdagit sa pabiling missing nga si ‘Eking.’
