CAGAYAN DE ORO CITY – Gipadumduman ni PNP chief Gen Benjamin Acorda Jr ang kapolisan nga kanunay’g matinud-anon sa ilang mga gipanumpaan nga serbisyo-publiko alang sa nasud.
Kini ang tipik sa unod sa mensahe ni Acorda nga gibasa ni PNP Human Resource and Doctrine Development Director Maj Gen Robert Lee atol sa pagdumdum sa ika-siyam ka tuig sa kamatayon sa 44 ka special action force sa Camp Vicente Alagar diin nakabase ang Police Regional Office 10.
Si Lee ang gipadala ni Acorda aron personal ipaabot ang iyang mensahe alang sa 44 ka PNP SAF troopers nga milampos pagpatay sa international bomber nga si alyas Marwan sa sekretong lugar sa Mamasapano,Maguindanao.
Miingon si Lee nga mahimong kawang ug walay hinungdan ang pagbuhis kinabuhi sa 44 ka SAF troopers kon dunay mga pulis nga mismo maghugaw-hugaw sa dignidad sa PNP.
Gihimo sa heneral ang mensahe atubangan mismo sa mga pamilya nila ni late Police Crrporals Chum Agbon;Romeo Senin II ug Godofredo Cabanlet nga pulos gikan sa Northern Mindanao nga apil sa Oplan Exodus mission aron mapatay ang terorista nga si alyas Marwan niadtong Enero 25,2015 sa kadlawon.
Hisayrang miani’g grabeng batikos kaniadto si late Pres. Noynoy Aquino kay nagtoo ang kadaghanan nga mas gigusto niini nga mahurot ang 55th SAF troopers sa mga kamot sa kaaway kaysa maapektuhan ang peace negotation sa gobierno ug Moro Islamic Liberation Front rason nga walay re-enforcement gikan sa PNP ug Armed Forces of the Philippines.
