CAGAYAN DE ORO CITY – Gipadumduman sa simbahang Katolika ang katawhan nga i-haom ang ilang mga paningkamot ug kagustuhan sa kinabuhi sa katudluan ni Kristo-Hesus aron mas angayang kakuhaan sa panag-ignan ngadto sa uban.
Kini ang hagit ni Archbishop Jose Cabantan,D.D.,SSJV alayon sa pagpalawom sa mga pagpamalandong ning panahon sa semana santa.
Miingon si arsobispo sa Archdiocese sa Cagayan de Oro nga gihatagan man ang tanan sa kagawasan sa pagbuhat sa mga butang ning kalibutan apan labing maayo kon kini pinasubay sa kagusgtuhan sa kahitas-an.
Gibutyag ni Cabantan nga unta masabtan sa katawhan ang pinakatuyo kon nganong nahimo pa nga nagpasakit,namatay ug nabanhaw si Kristo sa iyang kapanahonan.
Samtang ipatuman sa Police Regional Office 10 ang hugot nga pagbantay sa border controls aron dili mabutang sa sabotahe ang kahusay’g kalinaw samtang anaa sa pagpangandam ang kadaghanan ilabina sa kasimbahanan ug pilgrimage sites alayon sa pagtamo sa mga mahal nga adlaw.
Kini ang gibutyag ni Police Regional Office 10 spokesperson Police Maj. Joann Navarro samtang nangandam sila pagpadala sa dugang mga puwersa aron motabang paghatag seguridad sa semana santa.
Siya miingon nga sugdan ang pagpakatag sa dugang puwersa sa ugmang adlawa.
Gipasabot ni Navarro nga malukop ang tanang bahin sa rehiyon sa ilang ikatag nga puwersa pagsiguro nga dili makapanghasi ang pipila ka tawo o pundok alayon sa kalihukan.
