CAGAYAN DE ORO CITY – Palig-unon sa Police Regional Office 10 ang ilang presensiya sa nagkadaiyang bahin sa Northern Mindanao sa adlawan ug gabii.
Kini ang kagustuhan ni PRO 10 regional director Brig Gen Jaysen de Guzman aron mahatagan sa igong seguridad ang publiko batok sa kreminalidad.
Siya miingon nga kon unsa ang iyang gihimo nga peace and order strategy sa panahon nga provincial director pa kini sa Misamis Occidental Police Provincial Office ipatuman usab niya sa tibuok rehiyon ubos sa administrasyon niini.
Pagpasabot niini nga anaa sa upat hangtod unom ka pulis ang magpatuman sa police visibility sa adlaw ug gabii aron paspas maka-responde batok sa nagkadaiyang porma sa kremin.
Si De Guzman ang ika-40 nga regional director sa PRO 10 diin siya ang mipuli sa nag-retiro na sa serbisyo nga si Police Regional Director Brig Gen Ricardo Layug Jr sa gihimong retirement ug turnover ceremony sa Camp Alagar ning syudad kagahapong adlawa.
