CAGAYAN DE ORO CITY – Gitambungan ni Philippine National Police Chief General Rommel Marbil ang groundbreaking ug capsule-laying ceremony alang sa pagbalhin sa regional headquarters sa Police Regional Office sulod sa Kampo General Nicolas Capistrano sa Brgy Gusa ning syudad.
Kini human na-desisyonan sa Kampo Krame nga mabalhin ang maong buhatan gikan sa kasamtangang lokasyon niini sa Camp 1Lt Vicente Alagar sa Brgy Lapasan sa dakbayan.
Miingon si PRO 10 regional spokesperson Major Joann Navarro nga ang pagsaksi ni Marbil sa pagsubo sa umaabot nga bag-ong hedkuwarter ang apil na sa troop visit niini sa mga pulis sa Northern Mindanao region.
Sa wala pa mobalik sa kauluhan ang heneral,gisaksihan usab niini ang paghatag pasidungog sa pipila ka pulis nga nagpakita sa ilang katakos ug dedikasyon sa pagsanong sa trabaho.
Una niini,mihatag usab sa mensahe si Marbil ngadto sa tropa nga kanunay’ng magmatngon sa ilang trabaho aron magmintinar ang propesyonalismo,dedikasyon ug integridad.
