CAGAYAN DE ORO CITY – Gimanduan ni Police Regional Office 10 Director Brig Gen Jaysen De Guzman ang iyang tanang mga pulis nga magpabiling maunungon sa gisumpaan nga pahayag sa konstitusyon sa nasud.
Kini maoy pasidaan sa heneral tungod sa kainit sa isyu sa politika tali sa administrasyon ni Pres Bongbong Marcos ug sa kampo ni Vice Pres Sara Duterte diin gitugyan sa Pilipinas sa kustodiya sa International Criminal Court si kanhi Pres Rodrigo Duterte sa Netherlands.
Gibutyag ni De Guzman nga angayang likayan una sa mga pulis ang mga paghatag komento nga mabasahan sa social media ug bisan sa unod sa vlogs nga adunay kalambigitan sa isyu sa politika.
Kini aron dili maipit ug maapekuthan ang trabaho.
Siya miingon nga trabaho nila nga mohatag sa proteksyon sa publiko ug tigpasunod sa balaod.
Gihimo ni De Guzman ang pasidaan kay adunay mga pulis nga dismayado kung giunsa pagtratar sa kadagkuan sa PNP si Duterte dihang gidakop kini sulod sa Ninoy Aquino International Aiport gikan sa Hongkong kay gipadala sa ICC tungod sa kasong crime against humanity.
